Heilsuleikskólinn Hamravellir tók til starfa 16.júní 2008 og voru þá eingöngu starfræktar tvær deildir til að byrja með.

Í ágúst 2008 var leikskólinn kominn í fullan rekstur og allar fjórar deildirnar starfræktar.

Í dag eru Hamravellir 4 deilda leikskóli fyrir allt að 84 börn. Húsnæði leikskólans er í eigu Fasteignafélags Hafnarfjarðar. Skólar ehf. önnuðust rekstur skólans fyrstu árin en Hafnarfjarðarbær tók við rekstrinum þann 1. júlí 2020. Stærð húsnæðisins er samtals 727,5 m2. Heildarstærð lóðar er 6070,8 m2.

Deildir leikskólans eru fjórar og nefnast þær Birkikot, Hraunkot, Hvannakot og Mosakot.

Hvannakot og Hraunkot eru með tvö leikrými hvor, salerni og leikfangasafn en deila með sér listasmiðju.

Birkikot er með tvö leikrými, salerni og leikfangasafn. Mosakot hefur þrjú leikrými, salerni og leikfangasafn en deila listasmiðju með Birkikoti.

Listasmiðjur eru tvær í leikskólanum og er önnur staðsett á milli Hvannakots og Hraunkots en hin á milli Mosakots og Birkikots. Heilsustefnan leggur áherslu á markvissa listsköpunartíma frá 2ja ára aldri, þar sem unnið er með einn eða fleiri þætti listsköpunar.

Í miðrými leikskólans er fullbúið eldhús, skrifstofur, sérkennslustofa, viðtalsherbergi, starfsmannaaðstaða og íþróttasalur. Íþróttasalurinn er búinn fjölbreyttum tækjum til íþróttaiðkunar með köðlum í loftinu, rimlum á veggjum og leggur Heilsustefnan áherslu á að hafa mjúkt íþróttagólf til að draga úr slysahættu.

Heilsuleikskólinn Hamravellir starfar eftir Heilsustefnunni, en í Heilsustefnunni er lögð áhersla á góða næringu, hreyfingu og sköpun. Hugmyndafræði Heilsustefnunnar segir að með hollri og góðri næringu, nægri hreyfingu og útrás fyrir sköpun séu skapaðar kjörnar aðstæður fyrir börn til að þroskast á heilbrigðan hátt. Lesa má nánar um Heilsustefnuna á heimasíðu hennar, www.heilsustefnan.is.